ປະຫວັດຫຍໍ້ ພຣະອາຈານຊາຄຳແດງ

ປະຫວັດຫຍໍ້ : ພຣະອາຈານຊາຄຳແດງ

ເປັນພຣະນັກປະຕິບັດສາຍວິປັສນາກັມມັດຖານປະຕິບັດຊານເຕໂຊທາດ ຕາມປະຫວັດ ແມ່ນພຣະອາຈານໄດ້ ເຂົ້າຄອງວິປັດສະນາທີ່ວັດມະຫາພຸດທະວົງສາປ່າຫຼວງ ນຳພຣະເດດພຣະຄຸນຍາທ່ານມະຫາປານ ອະນັນໂທ, ເປັນພຣະຄອງວິປັສສະນາ ແຫ່ງພຣະຣາຊະອານາຈັກລາວ ພຣະອາຈານຊາຄຳແດງໄດ້ພັກຢູ່ທີ່ວັດພຣະທາດຫຼວງເໜືອ ມະຫາກຸດີ ນຳຍາທ່ານສົມເດັດອັຄະມະຫາບັນດີດ ລູກແກ້ວ(ຄູນ ມະນີວົງ) ພຣະສັງຄະນາຍົກ ແຫ່ງພຣະຣາຊະອານາຈັກລາວ.

– ຫຼັງຈາກນັ້ນກໍໄດ້ອອກປິກວິເວກ ປະຕິບັດວິປັດສະນາກັມມັຕຖານ ທີ່ພຸເຂົາຄວາຍ ໄດ້ສຳເຣັດຊານຂັ້ນໜຶ່ງ ແລ້ວລົງໄປຢູ່ບ້ານທ່າໝາກ ເຫັບ ເມືອງນາຄະບູຣີ ແຂວງສີທັນດອນ ສ້າງວັດທີ່ນັ້ນ ໄດ້ອອກສຶບຕໍ່ສະແຫວງຫາທັມ ທີ່ຖ້ຳແກ້ວທັມມະຣິດ ພູສາຣະແພຄອນແຮ່ ໄດ້ສຳເຣັດທັມຂັນສູງສຸດຢູ່ທີ່ນັ້ນ, ກ່າວວ່າຊານທີ່ທ່ານສຳເຣັດນັ້ນ ຊື່ວ່າເຕໂຊທາດ ສາມາດແປງກາຍ ຫາຍໂຕໄດ້ ເປັນຜູ້ມີຣິດ ຕອນທີ່ທ່ານພຣະອາຈານຊາຄຳແດງສຳເຣັດຊານນັ້ນ ສະມະນະສັກຂອງເພີ່ນໄດ້ພຽງຊາ(ພຣະອາຈານຊາ) ຊື່ສຽງເພິ່ນໂດ່ງດັງພຽງຕອນເປັນ ພຣະຊານັ້ນ ຄົນທັງຫຼາຍຈຶ່ງຮຽກຊື່ວ່າ ພຣະອາຈານຊາຄຳແດງ ມາແຕ່ບັດນັ້ນ ແຕ່ຄວາມຈິງ ຫຼັງຈາກນັ້ນ ເພິ່ນກໍໄດ້ຖືກຫົດສົນຈົນເປັນພຣະຄຣູ ແລະແຖມສົມພານຫຼາຍຫຼາບ ແຕ່ຄົນທັງຫຼາຍຍັງຮຽກເພິ່ນວ່າຊາຢູ່ຢ່າງນັ້ນ.

– ພຣະອາຈານຊາຄຳແດງ ໄດ້ເປິດສຳນັກວິປັສສະນາກັມມັດຖານ ທີ່ວັດທ່າໝາກເຫັບ ຈຶ່ງມີພຣະສົງສາມະເນນ ຕລອດທັງຍາດໂຍມ ໄປຮຽນນຳເພີ່ນ ບໍ່ວ່າປະຊາຊົນທຳມະດາ ຈົນຮອດເຈົ້ານາຍທັງມວນ.
– ລູກສິດຂອງພຣະອາຈານຫຼາຍອົງຫຼາຍທ່ານ ແຕ່ທີ່ຖືວ່າ ເປັນລູກສິດທີ່ສືບທອດເຈຕນາຣົມ ແລະໄດ້ດັ່ງທ່ານມີນັ້ນ ມີພຣະ 3 ອົງຄື:

1. ພຣະອາຈານຊາໄສ (ວັດດອນທໍຣະທີ) ສິກແລ້ວແຕ່ປີ 1982 ຍັງມີຊີວິດ ແລະບຳເພັງທັມຢູ່ເໝືອນກັບພຣະສົງ ທີ່ບ້ານນັ້ນ.

2. ພຣະອາຈານຊາສູດ (ບ້ານດອນສົ້ມໂຮງ) ສິກປີ 1976 ຍັງມີຊວິດຢູ່ ແຕ່ປະຕິບັດທັມດັ່ງກັບພຣະ ຢູ່ບ້ານດັ່ງກ່າວນັ້ນ.

3. ພຣະອາຈານຊາໂງນ (ພຣະຄຣູບຸນທອງ ວິປະໄຊຍ໌) ສ້າງວັດພູກິ່ງແກ້ວ ຫາດຊາຍຄູນ (ປັດຈຸບັນຢູ່ວັດໜອງດ້ວງ ແລະວັດນາຄູນ) ດ້ວຍເຫດຜົນທາງສຸຂະພາ®ຕ້ອງຢູ່ໃກ້ໝໍ ແຕ່ກໍນຳພາຍາດໂຍມສ້າງມະຫາກຸສົນຢ່າງຕໍ່ເນື່ອງ.

– ລູກສິດທີ່ຮຽນ ແລະເຂົ້າຄອງກັມມັດຖານນັ້ນ ທີ່ເປັນພໍ່ອອກນັ້ນ ເຂົາວ່າມີຫຼາຍທ່ານ ແຕ່ເທົ່າທີ່ຮູ້ ແລະຮູ້ປະວັດດີຄື ທ່ານນາຍຄຣູພັນ ຊາລີຈັນ ເກີດບ້ານ ແສນໃຕ້ ຕາແສງເມືອງແສນ ເມືອງໂຂງ(ແຂວງສີທັນດອນ) ແຂວງຈຳປາສັກ, ແຕ່ຍ້າຍຂຶ້ນມາຢູ່ນະຄອນຫຼວງວຽງຈັນ ສອນຢູ່ ໂຮງຮຽນເພັຍວັດ ແລະສຸດທ້າຍເປັນຄະນະສຶກສາກຳແພງນະຄອນ ມໍຣະນະກັມ ເມື່ອປິ 2002 ທີ່ບ້ານສະພານທອງ.

– ລູກສິດອີກທ່ານໜຶ່ງ ທີ່ເປັນລູກສິດຫົວແກ້ວຫົວແຫວນຂອງທ່ານອາຈານຊາຄຳແດງ ທີ່ຮຽນໃນສະໄໝຍັງເປັນພໍ່ອອກ ພາຍຫñù¤ໄດ້ບວດ ຄື ພຣະອາຈານພໍ່ເຖົ້າສິງ ບ້ານດອນຮີນ້ອຍ ເມືອງໂຂງແຂວງຈຳປາສັກ (ຢູ່ວັດຫາງດອນຮີ ແລະໄກ້ມໍລະນະພາບແລ້ວ ປະມານປີ 1993) ທ່ານພຣະອາຈານພໍ່ເຖົ້າສິງນີ້ ເປັນອາຈານຂອງຜູ້ຂຽນເອງ ເຂົ້າຄອງວິປັດສະນານຳເພີ່ນແຕ່ອາຍຸ 14 ປິ ແລະພຣະອາຈານຊາໂງນນີ້ ກໍເປັນອາຈານຂອງຜູ້ຂຽນ ອີກເຊັ່ນກັນ ເຂົ້າຄອງນຳເພີ່ນທີ່ວັດກາງໂຂງ ໃນໄລຍະດຽວກັນ ຄື ປິ 1980-1984 ຄືຜູ້ຂຽນຈະເຂົ້າຄອງນຳ ອາຈານທັງສອງນີ້ ຄືຍາມກາງພັນສາເຂົ້າຄອງກັບອາານພໍ່ເຖົ້າສິງຕະລອດ 3 ເດືອນ ບໍ່ເວັ້ນ ແລະຍາມອອກພັນສາເຂົ້າຄອງນຳພຣະອາຈານໃຫຍ່ຊາໂງນ ທີ່ວັດກາງໂຂງ ຈົນຮອດປີ 1984).

– ລູກສິດພຣະອາຈານຊາຄຳແດງໂດຍກົງ ທັງເປັນລູກສິດຂອງຍາທ່ານປານ ອະນັນໂທດ້ວຍ ທີ່ຮຽນນຳອາຈານຊາຄຳແດງ ໂດຍກົງຕອນເປັນພໍ່ອອກແມ່ນ ອາຈານພໍ່ເຖົ້າສີ ບ້ານຂີ້ນາກຫີນຮອງ ປັດຈຸບັນຢູ່ທີ່ວັດຫາດຊາຍຄູນນອກ ເມືອງໂຂງ ຮຽນນຳເພິ່ນຕອນເປັນພໍ່ອອກໃນທີ່ສຸດ ກໍອອກບວດ ທັງຜົວທັງເມັຍ ຊື່ວ່າແມ່ຂາວແດງ ຕອນຍັງໜຸ່ມຕ້ອງມາປະຈຳຢູ່ທີ່ວັດສີສັງວອນ ເພື່ອບໍ່ຢູ່ໃກ້ກັນ ແຕ່ປັດຈຸບັນຢູ່ວັດພູກິ່ງແກ້ວ ກອງມະນີຫາດຊາບຄູນ.

– ລູກສິດທີ່ກ່າວມານັ້ນ ຖືວ່າເປັນສິດເອກ ຂອງພຣະອາຈານຊາຄຳແດງ ສ່ວນທີ່ເປັນພຣະສົງນັ້ນ ລູກສິດເອກະຂອງເພິ່ນນັ້ນ ຈະຮຽກ ນາມນຳໜ້າວ່າ (ຊາ) ໝົດທຸກອົງ ດ້ວຍເຫດວ່າ ອາຈານເປັນພຽງຊາ ລູກສິດເຖິງເປັນຄຣູ ກໍຕາມ ແຕ່ບໍ່ກ້າໃຊ້ສະມະນະສັກເກີນອາຈານ ດ້ວຍເຫດນັ້ນ ພຣະອາຈານທັງສາມ ຈຶ່ງມີຊື່ທາງສະມະນະສັກພຽງຊາ ເທົ່ານັ້ນ.

ເນື້ອໃນໄດ້ຈາກ : ສະມາຄົມພຮະເຄືອງພຮະບູຊາລາວ

ขอขอบคุณเนื้อหาจาก Art and Culture of Laos